Суббота, 18.11.2017, 02:39
Приветствую Вас Гость | RSS

Ытык-Кюельская СОШ №2 им Д.А. Петрова

Меню
Альбомы
Статистика

Онлайн всего: 1
Гостей: 1
Пользователей: 0

Ахтыылар 4

Л.С. Захарова,

РСФСР үөрэҕириитин туйгуна,

СР үөрэҕириитин Бочуоттаах

үлэ ветерана.

Мин 1977-1980 үөрэх сылларыгар учууталынан, завуһунан үлэлээбитим

Оскуола дириэктэрэ Саха АССР бочуоттаах учуутала Слепцова Христина Ананьевна ыччаты иитиигэ-үөрэтиигэ үөһэттэн ананан, кыратык да намтаппакка инники күөҥҥэ сылдьарга олоҕун анаабыт киһи этэ.

Этэргэ дылы, кини олус киэҥ дууһалаах, ирдэбиллээх, киэҥ билиилээх салайааччы, мин киниттэн элбэххэ үөрэммитим, оройуон методическай кабинетыгар, учуутал идэтин, төрүт оскуоланы чинчийэн үөрэтэр институтка үлэлиирбэр элбэххэ туһалаабыта.

Кэлин буочарым да кини курдук буолбута.

Оҕолору үөрэтиигэ, биир сомоҕо кэлэктиип, бэйэлэрин идэлэригэр дьиҥ бэриниилээх учууталлар үлэлээбиттэрэ. Үүнэр көлүөнэни иитиигэ бары сыраларын, билиилэрин биэрбиттэрэ, тиэрдибиттэрэ - Данилова Вера Васильевна, Слепцова Зоя Михайловна, Шуткина Галина Абогоевна, Аммосов Михаил Михайлович, Макаров Святослав Тихонович, Бурцева Ольга Ивановна, Павлова Лидия Семеновна, Кононов Владимир Ильич, Чьямов Иннокентий Петрович, Аммосова Марфа Матвеевна, Меккюсярова Екатерина Никитична, Протопопова Зинаида Никитична, Большакова Анна Алексеевна, Павлова Клавдия Ивановна, Протасова Надежда Петровна, Луковцева Анна Дмитриевна, Слепцова Александра Порфирьевна, Винокурова Клавдия Степановна, Софронеева Аграфена Петровна, Товарова Изабелла Алексеевна, Попова Нина Михайловна уо.д.а.

Хомойуох иһин, сорохторо билигин суохтар.

Ол гынан баран, олорорбут тухары биһиги өйбүтүгэр-санаабытыгар куруутун бааллар.

Элбэхтэн аҕыйаҕы аҕыннахха: Слепцова Н.И. ыытар ураты ис хоһоонноох пионерскай сбордара, Попова Н.М салайар өрүүтүн инники күөҥҥэ сылдьар кылааһа, Чьямов И.П умнуллубат уруоктара, ирдэбилэ, саахымат абылаҥар оҕолору угуйара, Кононов В.И. республикаҕа биллэр үлэтэ о.д.а умнуллубат үлэ сорҕото.

Оскуола олоҕуттан аҕыйах түгэни ахтан санаан аастахха, бары көхтөөхтүк кыттарбыт: мин куруһуок салайааччыта буоламмын “Кошкин дом” диэн остуоруйанан испэктээкил ситиһиилээхтик туруоран биһирэбили ылбыппыт. Бырааттыы Заболоцкайдар, Горохов, Иванова Валя, о.д.а оҕолор козел, коза, куоска оҕолорун, сибиинньэ, кини оҕолорун оонньооннор көр бөҕө буолбута. Төрөппүттэр астыммыттара. Афанасьев Афоня субуота аайы ыытыллар биэчэргэ ис иһиттэн иэйэн, баҕаран, үнкүүлээн, пантомима көрдөрөн үөрдэрэ. Учууталлар да онтон хаалсыбат этибит, художественнай самодеятельноска көхтөөхтүк кыттарбыт. Слепцова Х.А. өс хоһооннорунан сценка суруйан сыанаҕа туруорбуппут. Ол тылларын кэлин хаалларбатахпыттан хомойобун, Аммосов М.М Моотуонаны оонньоон, Аммосова М.М.-лыын ааппытын булкуйа булкуйа концеры ыытарбыт биир умнуллубат өйдөбүл.

Оскуола коллектива бары ыытыллар тэрээһиннэргэ көхтөөхтүк кыттарбыт. Ол курдук, Хара-Алдан учаастагар концерт көрдөрө, кыылы иитэр фермаҕа, сүөһүгэ дулҕа быһыытыгар, оройуон киинигэр ыытыллар субботниктарга үөрүүнэн үлэлиирбит.

Бу оскуола кыһатыгар үөрэнэн иитиллэн тахсыбыт оҕолортон - билигин республикаҕа биллэр ученайдар, салайааччылар, Саха сирин норуотун хаһаайыстыбатын үтүөлээх үлэһиттэрэ, туйгуннара буоллулар. Ордук киэн туттабын Борисов Егор Егоровиһынан – медицинскэй наука кадидатынан, Дьокуускай куорат доруобуйаҕа харыстабылын управлениетын начальнига буола үүммүт үөрэнээччибинэн.

Хайа да үүнээйи уута, сылааһа, сырдыга суох үүммэт. Син ол тэҥэ оҕо эмиэ сырдык, сылаас уйаҕа үүнэр, сайдар.

Хас биирдии киһи олоҕор саамай умнуллубат кэрдиис кэминэн буолбут оскуола сүрэхтэн сүппэт, өрүү ахтар-саныыр кыһа буола турдун.

 

З.К. Куприянова

 

 

Мин 1978 сыллаахха Ытык-Күөл аҕыс кылаастаах оскуолатыгар алын кылаастары үөрэтээри ананан үлэлии кэлбитим. Миэхэ үһүс кылаас оҕолорун туттарбыттара. Сүрдээх чуумпу, үлэлии үөрэммит оҕолор түбэспиттэрэ. Кинилэр истэригэр бааллара – Павлова Лира, Слепцова Наташа, Павлов Дима, Тарабукин Петя, Павлов Саша о.д.а. Бары эйэлээх, сүрдээх түмсүүлээх оҕолор этилэр.

Мин үлэлиир кэммэр үтүөкэн да учууталлар, салайааччылар үлэлээн ааспыттара. Ол курдук биир бэйэтин идэтигэр бэриниилээх, ирдэбиллээх директор Христина Ананьевна Слепцова этэ. Кини поурочнай былааммытын, сыллааҕы үөрэтэр программабытын барытын иҥэн-тоҥон бэрэбиэркэлиирэ. Элбэх мунньаҕы, педсоветы этиллибит бириэмэтигэр лоп-бааччы саҕалыыра. Эдэр учууталларга болҕомтолоох салайааччы этэ.

Иккис өйдөөн хаалбыт директорым Иосиф Игнатьевич Николаев буолар. Кини салайбыт кэмигэр оскуола материальнай базата хаҥаабыта. Саҥа мастерской туттарбыта. Учууталлар субуотунньукка элбэхтэ сылдьыбыттара. Кэлин алын кылаас оҕолоругар анаан туруорсан саҥа оскуола туттарбыта. Директорбыт сүүрэн-көтөн орто оскуола үрдүк аатын ылбыппыт. Оскуола иһигэр саҥа кабинеттар баар буолбуттара. Иосиф Игнатьевич коллективы түмэ тардан элбэх үлэни ыыппыта.Үлэлээбит сылларбар А.А. Слепцов, Г.Г. Черноградскай, Н.Н. Голиков, В.Н. Наумов, о.д.а. директордаабыттара.

Алын кылаастарга элбэх опыттаах учууталы кытта алтыһан үлэлээбипитин олус астына саныыбын. МО салайааччыта М.Г.Слепцова үгүс өрүттээх үлэни ыытара. Егор Жирков оскуолаларга киллэрбит концепциятын тутуһан саха национальнай культуратын үөрэтиигэ ордук нуучча кылаастарыгар дьаныһан туран үлэлиирбит. Ол кэнниттэн 6 саастаах оҕолору 1-4 программанан үөрэтии саҕаламмыта. Куоракка кэлэн курстарга үөрэнэн, сертификат ылан баран, детсадтан саҕалаан үөрэтэр этибит.

Бары да оҕо иитиитигэр бэйэлэрин сэмэй кылааттарын киллэрбит учууталлары кытта үлэлээн ааспыт эбиппин: С.Г.Малышева, М.Г.Слепцова, А.П.Луковцева, И.С.Слепцова, Т.В.Константинова, Л.М.Тосина, В.М.Толстякова, С.П.Борисова, М.Д.Егорова, М.Н.Неустроева о.д.а.

Бары бииргэ олус көхтөөхтүк үлэлиирбит. Ол кэмнэргэ аттестация барар этибит. Бары хардары-таары уруоктарга сылдьан, опыт атастаһан, хардарыта көмөлөсүһэн үлэлиирбит. Оччолорго оскуолабыт иһинэн предметнэй нэдиэлэлэр, олимпиадалар, спортивнай күрэхтэһиилэр утумнаахтык буолаллара. Араас пионерскай сбордар, тимуровскай үлэлэр олус тэрээһиннээхтик ааһаллара. Сайын аайы оҕолор үлэ-сынньалаҥ лааҕырыгар сылдьаллара. Үөрэх дьыла бүттэҕинэ ыһыах тэрийэн төрөппүттэрдиин сүүрбүт кэмнэрбин күндүтүк саныыбын.

Ииппит–үөрэппит оҕолорум ыал ийэлэрэ-аҕалара буолан үөрэхтэнэн, үлэһит буолбуттара ыраатта. Киэн туттан ааттыыбын: Саввина Л.И. - Дьокуускай куорат Губинскай уокуругун начальнига, Винокурова Л.И. – СВФУ преподавателэ, В.Е.Миронова – Нерюнгри куоракка үрдүк үөрэхтээх врач, Попова Я.И. - Тааттатааҕы лицей омук тылын учуутала, Осипова Ч.В.- нуучча тылын учуутала о.д.а. Элбэх омук оҕолоро үөрэммиттэрэ.

Биир сыл алын кылаастарга завучтаабытым. 1992 с. доруобуйам туругунан үлэлээн бүппүтүм. Үлэлээбит оскуолабын, коллегаларбын олус күндүтүк, истиҥник саныыбын. Төһө да дьиэбэр олордорбун 1993-2001 с. репетиторынан үлэлээбитим. Маҥнай ыалларым оҕолоро сылдьаллара. Онтон истиһэ-истиһэ Ытык-Күөл оскуолаларын оҕолоро тиһигин быспакка эбии үөрэнэ кэлэллэрэ. Кэлин гимназияҕа киирэргэ эбии бэлэмнээбитим. Элбэх оҕо гимназияҕа улахан конкурсу ааһан киирэллэрэ. Оҕолор да, төрөппүттэр да үөрэн махтаналлара. Түмүкпэр, үлэлээн ааспыт күндү оскуолам коллективын, үөрэнээччилэрин 50 сыллаах үбүлүөйүнэн истиҥник эҕэрдэлиибин. Эһиги сыралаах үлэҕит үтүө түмүктэрдээх буоллун, барыгытыгар чэгиэн доруобуйаны, үгүс үөрүүнү, элбэх ситиһиини баҕарабын

Күндү оскуолабыт сылын ахсын өссө саҥаттан –саҥа күүһү эбинэн саҥа олох сайдыытынан тэҥҥэ хаамсан тупса, чэчирии, сайда туруохтун.

Е.Н. Захарова

 

Мин 1976-1982 үөрэх сылларыгар Ытык – Күөл 8 кылаастаах оскуолатыгар пионер баһаатайынан үлэлээбитим, пионерскай дружина бастакы космонавт дьахтар, Советскай Союз Геройа В.В.Терешкова – Николаева аатын сүгэрэ.

Ити кэмҥэ иитэр үлэ үксүн пионерскай үлэ чэрчитинэн ыытыллара, октябрятскай группаларга 7-8 кылаас оҕолоро баһаатайдарынан үлэлииллэрэ, производственник баһаатайдар эмиэ бааллара. Пионерскай үлэлэр Бүтүн Союзтааҕы “Всегда готов!”, ” Никто не забыт, ничто не забыто!” марш балаһыанньанан ыытыллаллара. Начаалынай кылаас учууталлара, кылаас салайааччылара бары бу үлэттэн туора турбат этилэр.Этэрээттэринэн курэхтэһиилэр ыытыллаллара, үчүгэй үлэлээхтэр уҥа флангаҕа иһэр этэрээт аатын сүгэллэрэ. Хас этэрээт бэйэтэ ааттаах, ол ааты чиэстээхтик сүгэргэ кыһаллара. Аркадий Гайдар аатынан этэрээт (кылаас салайааччыта Попова Н.М, баһаатай производственник Григорьева Ира) Арзамас куоракка баран Гайдар куоратыгар, Филипп Лобанов аатынан этэрээт (кылаас салайааччыта Павлова Л.С.) Шушенскайга Ленин сыылкаҕа сылдьыбыт сиригэр экскурсиялаан кэлбиттэрэ. Пионерскай субботниктар, сбордар, тимуровскай үлэлэр былааннаахтык бараллара. Оҕолор бу үлэттэн туора турбаттар этэ, ый аайы этэрээттэринэн сыһыарыылаах памятниктарын ыраастыыллара, ветераннарыгар баран мууһун, маһын бэлэмигэр көмөлөһөллөрө. Үчүгэйдик үэрэнэр активист оҕолор Бүтүн Союзтааҕы “Орленок” лааҕырга сынньаммыттара, «Бэлэм буол” хаһыат республикатааҕы “Володя Ульянов” дневнигэр киллэриллибиттэрэ.

1978-1979 үэрэх сылыгар дружина үлэтигэр ситиһиилээх буолан, Өлүөнэ устун круиз путевканан наҕараадаланан, үгүс активист оҕо теплоходунан устан экскурсияҕа сылдьан кэлбиттэрэ. Оҕолор пионерскай үлэҕэ активнайдык кытталлара. Умнуллубат пионерскай костердар, көхтөөх “Зарница” оонньуута - бу барыта дьоллоох пионерскай саас оҕолорго биир эмит өйдөбүлү хаалларбыт буоллаҕына ол аата үтүө түмүк дии саныыбын.

 

С.Г. Малышева,

норуот үөрэҕириитин туйгуна.

 

Мин Ытык-Күөл 8 кылаастаах оскуолатыгар 12 сыл (1979-1981, 1986-1996 сс.) үлэлээбитим. Бу кэмнэргэ оскуола директордарынан Слепцова Х. А., Никифоров П. П., Слепцов А. А., Николаев И. И. үлэлээбиттэрэ. Бары да үлэлэригэр эппиэтинэстээх, дириҥ билиилээх, коллективы биир сыалга түмэр дьоҕурдаах салайааччылар этилэр. Педколлектив сүрдээх үлэһит, эрчимнээх, көхтөөх уонна эйэлээх этэ. Оскуолаҕа араас мероприятиялар, олимпиадалар, күрэхтэһиилэр ыытыллаллара. Оройуоннай, зональнай семинардарга аһаҕас уруоктары биэрэрбит. Художественнай көрүүгэ көхтөөхтүк кыттарбыт. А. А. Слепцов салайыытынан струннай кыракый оркестрдаах этибит. Директорбыт Христина Ананьевна наһаа үчүгэйдик хоһоон ааҕарга, сценкаҕа оонньуура. Эмиэ кини көҕүлээһининэн, В. И. Кононов салайыытынан сааһын хайыһардыырбыт. Үгүс учууталлар спортивнай күрэхтэһиилэргэ кыттан оскуола чиэһин көмүскүүллэрэ: Д. А. Аргунова, И. С. Слепцова, В. И. Кононов, А. А. Неустроев, Р. С. Дегтярева у. д. а.

Үтүө тылларына Иосиф Игнатьевич Николаевы ахтабын. Олоххо саҥалыы көрүүлээх, туһунан өйдөөх-санаалаах, сайдыылаах, ис сүрэҕиттэн үлэтигэр кыһамньылаах салайааччы этэ. Кини көҕүлээһининэн биһиги эр дьон учууталларбыт саҥа начальнай оскуола дьиэтин туппуттара. Алын сүһүөх начальнай оскуола учууталлара бары тус-туһунан суоллаах-истээх, киэҥ фантазиялаах, кыра оҕо психикатын билэр, методиканы толору баһылаабыт дьоннор. Олус үчүгэйдик саныыбын колллегаларбын Светлана Петровнаны, Ирина Семеновнаны, Мотрена Герасимовнаны, Александра Павловнаны, Екатерина Никитичнаны, Татьяна Константиновнаны, Валентина Васильевнаны, Валентина Михайловнаны, Мира Дмитриевнаны, Зинаида Николаевнаны, Зоя Константиновнаны, Мария Давыдовнаны, Лена Михайловнаны. Хаһан даҕаны эһигини умнубаппын уонна куруутун үтүө тылларынан ахтабын. Умнубаппын биир сыалга турунан үлэлиирбитин, эһиги көргүтүн-наргытын, бэйэ-бэйэбитин өйөһөрбүтүн.

Бэйэм туһунан кэпсээтэхпинэ, куорат биир бастыҥ, президентскэй оскуола-гимназиятыгар начальный кылаас учууталынан үлэлии сылдьабын. Тыа оскуолатын учууталын, чуолаан Таатта, түһэн биэрбэтэрбин диэн кыһаллабын уонна кыракый ситиһиилээхпин. Ол курдук үс сыл үлэлээн, сыралаһан таһаарбыт оҕолорум (ньуучча кылааһа, 33 оҕо) быйыл 5 кылааска сыл аҥарын түмүгүнэн сэттэ бэһис кылаастарга үөрэх-билии хаачыстыбатын түмүгүнэн бастаан иһэллэр. Быйыл 1 «г» кылааһы үөрэтэбин. Кырдьар сааспар эмиэ үчүгэй коллективка, культурнай эйгэҕэ түбэһэн үлэлии сылдьарбыттан үөрэбин. Эһиэхэ, күндү коллегаларбар, юбилейгытынан эҕэрдэлээн туран, толору үлэттэн дуоһуйууну, олоххутугар дьолу, иннигэ эрэли, сырдык санааны, ситиһиини баҕарабын.

 

М.Г. Слепцова,

РФ үөрэҕириитин туйгуна,

СР үөрэҕириитин үтүөлээх үлэһитэ,

Педагогическай үлэ ветерана

 

Ахтан, санаан аастахха бу оскуолаҕа саамай таһаарыылаахтык үлэлээбит сылларым эбиттэр. Саас сааһынан кэпсээтэххэ...

Ытык-Күөлгэ 1979 сыллаахха көһөн кэлбиппит. Миигин Ытык-Күөл аҕыс кылаастаах оскуолатыгар 2 нуучча кылааһыгар учууталынан анаабыттара. Оччотооҕу кэмҥэ биһиги бары предметтэри, өссө физкультура, музыка, уруһуй, үлэ уруоктарын үөрэтэрбит. Нуучча кылаастарыгар саха тылын уруога диэн суоҕа, бары уруоктар нууччалыы ыытыллаллара.

 

Кабинетнай система киириитэ

1982 сыллаахха төрөппүттэрим көмөтүнэн оскуолаҕа бастакы ыскаап- дуоска оҥотторбутум. Наумова Галина Михайловна, Сизых Анатолий Егорович салалталаах биир күнүнэн оҥорон бүтэрбиттэрэ. Дьэ онтон саҕалаан кабинеттары оҥоруу күүскэ турбута, араас үчүгэй кабинеттар оҥоһуллан республиканскай семинардар ыытыллыбыттара. Ол курдук Нина Михайловна кабинетыгар республиканскай семинар үрдүк таһымнаахтык ыытыллыбытын өйдөөн хаалбыппын. Билии таһыма, үлэлии үөрүйэх, араас техническэй ньыманы табатык туһаныы, бэйэ оҥоруу карточкалара, методическай үлэ таһыма Нина Михайловна үөрэх завуһунан үлэлээбит сылларыгар лаппа үрдээбитэ. Кини сайыҥҥы уоппускатын кэмигэр дойдутугар Горькай куоракка баран анаан-минээн саҥаттан саҥа сүүрээннэри билэн-көрөн кэлэн бэйэтин уруоктарыгар туһанара, биһигини үөрэтэрэ. Оччотооҕу кэм бастыҥ методистарын Бабанскай, Шаталов үөрэтэр ньымаларын биһиэхэ билиһиннэрэн уруоктарга элбэхтик туттарбыт. Дьэ, онтон үөрэнэн мин эмиэ саҥаттан саҥаны көрдүүр, була сатыыр буолбутум, үлэм девиһинэн “Көрдүөххэ, булуохха, боруобалыахха, туһаныахха” – диэн буолбута.

Бастакы алта саастаахтары үөрэтии

1984-1985 үөрэх сылыгар алта саастаах оҕолору детсадка үөрэтэр дьаһал кэлбитигэр Анна Николаевна миигин “Чуораанчык” детсад базатыгар анаабыта. Урукку сельсовет хонтуората буолан турбут дьиэни сууйан, өрөмүөннээн, таһыгар сабараанньа оҥотторон, онно үөрэтэр буолбутум. Баҕалаах олус элбэҕэ да нуучча кылааһа дэнэр буоламмыт, “Берёзка” детсад сэбиэдиссэйэ Давыдова Валентина Степановна туруорсан, бэлэмнэнии группатын оҕолорун барыларын ылбыппыт, эбии атын детсадтан аҕыйах оҕону биэрбиттэрэ, барыта 25 оҕо буолбута. Баспытааталынан Колосова Марианна Николаевна диэн опыттаах үтүөкэн иитээччи үлэлээбитэ. Районоттан Ильина Анна Николаевна сотору-сотору кэлэн бэрэбиэркэлиирэ уонна этэрэ: “Буукубаны олох көрдөрүмэ, суруйтарыма!”. Сылы быһа тыллары сүһүөххэ араара, сүһүөхтэн дорҕооннору буларга үөрэтэн, этии оҥотторо, кэпсээн кэпсииргэ, хоһоон нойосуус ааҕарга, билии-көрүү таһымын кэҥэтэргэ үөрэппитим. Аҕыйах ааҕар оҕо баара сынньалаҥҥа кинигэттэн уонна проекторынан көрөн остуоруйа ааҕаллара, саас оҕолор бары бэйэлэрэ ааҕар буолбуттара. Онон 1-кы кылааска букубаарбытын биир ыйынан бүтэрбиппит. Кэлин бу кылаас оҕолоро сүрдээх грамотнай, хайдах да уһун хоһоону нойосуус үөрэтэ биэрдэххэ түргэнник үөрэтэллэрэ, 1 мүнүүтэҕэ 50-чакаҕа тиийэ холобуру суоттууллара. Бастакы кылааска 11 оҕо, үгүстэрэ нуучча оҕолоро эбии үөрэнэ киирэн улахан мэһэйи оҥорбуттара. Эбии сорудахтарга элбэх карточкалаах буолан быыһанарым.

 

Үлэҕэ иитии, ОППТ уруоктарын туһата.

1985 сыллаахха оскуола оҕолорун үлэҕэ иитии, профориеантацияны билиһиннэрии боппуруостара күүскэ турбута, ОППТ ( общественно- полезный производственный труд) диэн уруоктар баар буолбуттара. Ол уруокка тэрилтэлэринэн (типографияҕа, бытовойга, аптекаҕа, уо.да а) экскурсияларга сылдьарбыт. Уруоктарга «Цена 1 минуты» диэн термин киирэн, 1 мүнүүтэҕэ төһө үлэни оҥоруохха сөбүй диэн темаҕа уруоктартан саҕалаан, оҕо бэйэтэ төһө холобуру суоттуон, төһө тылы ааҕыан, суруйуон сөбүн бэрэбиэркэлиирбит. Юннатскай станцияҕа тиийэн рассада таһааран, саас ол рассадаларбытын кирээдэҕэ олордон, сайын лааҕыр тэрийэн үлэлэтэн, күһүнүн хомуйан, үлэлэрин түмүгүттэн үөрэллэрэ.

1986 с. сайыҥҥы каникулга оҕолорго анаан лааҕырдары үлэлэтэн саҕалаабыппыт.Колесов Дмитрий Дмитриевич директордаан олордоҕуна СХТ базатыгар Собакин Макар Семенович көҕүлээһининэн ол тэрилтэ5э үлэлиир дьон оҕолорун уонна ыарахан иитиилээх 27 уолу мунньан үлэлэппитим. Аввакумов Николай Пантеймонович салайааччылаах, Бочуров Ян биригэдьиирдээх территория ыраастааһыҥҥа, өрөмүөнүгэр, кырааскаҕа, теплицаҕа оҕуруот аһын үүннэрэн көрүүгэ, дулҕа быһыытыгар сылдьыбыттара. Үлэлээбит күннэрин күн аайы таабыллаан, түмүгэр хамнас аахсан оҕолор үөрбүт харахтара өйбөр хатанан хаалбыт.

Николаев Иосиф Игнатьевич, Аргунова Диана Афанасьевна көҕүлээһиннэринэн оскуола таһыгар теплица туттаран, араас оҕуруот аһын олордон, сайыҥҥы сынньалаҥҥа кыра кылаас оҕолорун уочаратынан үлэлэтэн, үөрэтэн, күһүн үүнүү хомуйан оскуолабытыгар туттарбыппыт. Онно аан бастаан тыква үүннэрэн, сэбирдэхтэрэ улаханын, тыква бэйэтэ бөдөҥүн сөхпүппүт аҕай. Үлэҕэ такайыы үөрэнээччилэр олохторугар элбэҕи туһалаабыта буолуо диэн эрэнэбин.

 

Саҥа оскуолаҕа.

Николаев Иосиф Игнатьевич директорынан ананан баран коллективка бэйэтин санаатын, былаанын кэпсиирэ, биһигиттэн туох сонун идеялаахпытын ыйыталаһара. Биһиги үөрэнээччилэрбит бары орто оскуолаҕа салгыы үөрэнэллэр, биһиги бэйэбит да үөрэтэр кыахтаах, кэлин оскуолаларын ааттатар дьон буолан тахсыахтара диэн сыал туруорунан 1991-1992 үөрэх дьылыгар орто оскуола буоларбытын ситиспитэ. Мин кыра кылаастарга завучтуу сылдьар этим. Кыра кылаас оҕолоро туһунан үөрэнэр дьиэлээхтэрэ буоллар олус да үчүгэй буолуо этэ диэн этиибин өйөөн, туруорсан саҥа корпус туттарбыта. 1991-1992 үөрэх дьылыгар сааһыары саҥа корпуска үөрэнэр дьолломмуппут. Ытык-Күөлгэ, ханан да суох маҥнайгы сылаас туалеттаах буолан элбэх киһини ымсыырдыбыппыт. Методистар курстарыгар сылдьан кыра кылаастартан таҥан профильнай кылаастары аһыахха сөп эбит диэн санаабын олоххо киллэрээри директорбар Иосиф Игнатьевичка кэпсээбиппэр бэркэ диэн сөбүлээн былаан оҥостубуппут. Төһө да районолар өйөөбөтөхтөрүн үрдүнэн 1991-1992 үөрэх дьылыгар саҥа идеябытын олоххо киллэрэргэ сүбэлэспиппит. Политехническай, гуманитарнай уонна эстетическэй хайысхалары талан үлэлээн барбыппыт. «Развивающие игры по математике “ диэн предмети киллэрэн Попова Н.М. наһаа сэргэхтик ыытара. Гуманитарнай кылаастарга 2 кылаастан английскай тылы Иванова Александра Титовна, Парфенова Изольда Васильевна олус үчүгэйдик үөрэппиттэрэ. Иосиф Игнатьевич сетевой үөрэх ситимэ баар буолуохтаах диэн этиитин туһанан, музыкальнай оскуоланы кытта дуогабар түһэрсэн, кыра кылаастарга хор уонна ритмика чааһын киллэрбиппит. Анал үөрэхтээх хормейстердар Антоева Мария Ильинична, Иванова Марфа Иннокентьевна хор уруоктарын, аккомпаниатор Березкина Екатерина, хореограф Иванова Розалия Михайловна ритмика уруоктарын оҕолор наһаа сөбүлүүллэрэ. Оччотооҕу кэмҥэ «Коллективный способ обучения», сайыннарыылаах үөрэхтээһин саҥа ньымалара киирэн эрэрэ. Ол саҥа технологиялары уруоктарбытыгар бары туттан саҕалаабыппыт.

1994 с. муус устар 13 күнүгэр « Творческий отчет учителей начальных классов и учителей работающих в профильных классах» диэн республиканскай семинар ыыппыппыт. Бары биир киһи курдук кыттан 16 аһаҕас уруогу ыыппыппыт. Бу семинарга Слепцова И.С.уруогар оҕолор пааранан үлэлиир, Парфенова И.В.- английскай тыл уруоктарын 2-3 кылаастарга, Парфенова В.В.- ааҕыы уруогар ааҕыы араас ньымаларын туһаныы, Луковцева А.П.- айылҕа уруогар оҕолор бэйэлэрин чинчийиилэрин систематын, Кононов В.И.- физкультура уруогар бэйэтэ оҥотторбут тэриллэрин туһаныытын, Малышева С.Г.- оҕо тиэкиһи кытта үлэлиирин, Слепцова М.Г.- нуучча тылыгар сайыннарыылаах оонньуулары туһаныытын, Тосина Е.М.-төгүл уонна түҥэтии таблицаларын үөрэтиигэ сайыннарар оонньууну таба туһаныытын, Борисова С.П.-математика уруогар задача суоттааһыныгар сайыннарар оонньууну туһаныыны, Захарова М.Д.- ааҕыы уруогар оҕо культурнайдык таба саҥарыытын үөрэтиитин, Сивцева И.А.- математика куруһуогар кыра саастаах оҕолору математическай өйдөбүллэри үөрэтиитин, Попова Н.М.- кыра саастаах оҕолорго математика уруоктарыгар сайыннарыылаах оонньуулары таба туһаныытын уонна ити уруоктары ыытарыгар анаан мунньубут карточкаларынан паапкалары оҥорбут быыстапкатын, Бурцева О.И- компьютернай оонньууларын, Антоева М.И.-хор уруогун, Иванова Р.М.- ритмикага уруоктарын көрдөрбүттэрэ. Бу урдук таһымнаах тэрээһини эдэр учуутал-завуч Егорова Мария Давыдовна сүрүннээн ыыппыта. Республика араас оройуоннарыттан кэлбит учууталлар бу саҥа сүүрээннэри сөҕөн-махтайан тарҕаспыттара.

Оскуолаҕа оҕо доруобуйатыгар улахан болҕомтобутун уурар этибит. Хас чиэппэр аайы араас спортивнай көрүҥнэргэ күрэхтэһиилэри Ильич салалтатынан ыытарбыт. Аан бастаан спонсорствоны олохтоон, бириис арааһын туттаран үөрүү-көтүү бөҕө буоларбыт.

 

«Воскресная” оскуола

1993 с. сааскы каникулга “ Воскресная школа” диэн оскуола5а киириэхтээх оҕолорго анаан дьарыктары Кокова Зинаида Николаевналыын ыытан көрбүппүт. Уруок быыһыгар психолог Товарова Изабелла Алексеевна хас биирдии оҕону кытта собеседование ыытан, оскуолаҕа киирэн үөрэнэргэ төһө бэлэмнээхтэрин бэрэбиэркэлээбитэ. Күнүнэн түмүк таһааран испиппит, түмүгүн төрөппүттэргэ иһитиннэрэн, 2 кылааһынан оҕолору испииһэктээбиппит. Ол кэмтэн ыла бастакы кылааһы ыларбар итинник дьарыктары ыытарым оҕолорго да, төрөппүттэргэ да туһалаах буолбута. Учуутал саҥа кылааска хайдах билиилээх, сайдыылаах оҕолор киириэхтээхтэрин, ханнык программанан үлэ

Форма входа
Календарь
«  Ноябрь 2017  »
ПнВтСрЧтПтСбВс
  12345
6789101112
13141516171819
20212223242526
27282930
Случайное фото
Случайное фото
Баннеры
Министерство образования и науки Российской Федерации

Управление образования Таттинского улуса

Федеральный портал "Российское образование"

Единое окно доступа к образовательным ресурсам

Единая коллекция цифровых образовательных ресурсов
Федеральный центр информационно-образовательных ресурсов
йойойой йойойойййй

Copyright МБОУ Ы-КСОШ №2 © 2017
Хостинг от uCoz