Суббота, 18.11.2017, 02:35
Приветствую Вас Гость | RSS

Ытык-Кюельская СОШ №2 им Д.А. Петрова

Меню
Альбомы
Статистика

Онлайн всего: 1
Гостей: 1
Пользователей: 0

Ахтыылар 6

Е.И. Татаринова,

СР үөрэҕириитин туйгуна

 

Учуутал буоларга уһаарыллыбыт оскуолам,

үүнэ-сайда тур, саҥа суолу тэл!

 

Сааһыран олорон санаатахха, күн-дьыл түргэнник элэстэнэн ааһар эбит. Олох соторутааҕыта эрэ эдэр учуутал Ытык-Күөл аҕыс кылаастаах оскуолатыгар учуутал буолан, кылааска киирэн эрэрим

Сөбүлүүр идэ-дьоллоох олоҕу олорорго улахан суолталаах. Университеты бүтэрэн, Өлүөхүмэҕэ үлэлээн баран, 1984 сыллаахха дойдубар кэлбитим. Бастаан утаа, учуутал миэстэтэ көстүбэккэ, Киносеть тэрилтэтигэр методиһынан киирбитим. Онтон иккис ыйбын үлэлии олордохпуна, оскуола директора Наумов Василий Никифорович үлэҕэ ыҥырбыта. Өлүөхүмэҕэ нуучча кылаастарын саха тылыгар үөрэппит киһи, Тааттам сахалыы куттаах оҕолорун үөрэтэрбиттэн олуһун үөрбүтүм, тута сөбүлэспитим. Толору чаастанан, кылаас ылан, ол кэмтэн ыла бүгүҥҥү күҥҥэ диэри илиибин араарбакка үөрэнээччилэри саха тылыгар уһуйабын.

Оскуолаҕа өр сылларга директорынан, завуһунан, саха тылын уонна литературатын учууталынан үлэлээбит ытыктыыр аҕа саастаах киһим, Саха республикатын үтүөлээх учуутала Слепцова Христина Ананьевна саҥа коллективка үлэбин саҕалыырбар күүс-көмө буолбута, сүбэ-ама биэрэн наставниктаабыта. Оччолорго бары биридимиэттэр анал кабинеттаах этибит. Техническэй тэрил да, көрдөрөн үөрэтэр матырыйаал да соччо элбэҕэ суоҕа, онон кабинеты оҥостуу барыта бэйэбит илиибитинэн буолара.

Эдэр учууталлар элбэх этибит. Миигин сэргэ билигин да бииргэ үлэлии сылдьар коллегаларым Луковцева М.Н.,Петрова А.П., Шуткин А.С. араа-бараа кэлбиппит. Олус көхтөөх этибит: үлэ буоллун, сынньалаҥ буоллун. Комсомол ииппит дьоно буолан, барыга бары сыстаҕас этибит. Туохтан да толлон, симиттэн турбат эдэр дьон араас тэрээһиннэри оскуола да, нэһилиэк да иһигэр ыытарбыт, күрэхтэһиилэргэ кыттарбыт. Хас да сыл Мира Николаевналыын тэрилтэлэргэ лектордаабыппыт.

Оскуола коллектива сүрдээх түмсүүлээҕэ, куруутун биир сүбэнэн сылдьарбыт. Кырдьаҕас, эдэр диэн сааһынан арахсыы суоҕа. Ити кэмнэргэ бииргэ үлэлээн ааспыт аҕа саастаах коллегаларбын истиҥник саныыбын: Владимир Ильич Кононовы, Александр Александрович Слепцову, Ольга Ивановна Бурцеваны, Егор Егорович Максимовы, Розалия Николаевна Корнилованы, Маргарита Герасимовна Москвитинаны, Диана Афанасьевна Аргунованы, Лидия Семеновна Макарованы, Зоя Афанасьевна Колесникованы уо.д.а. Кинилэр баай опыттарыттан үллэстэн, учуутал айымньылаах үлэтин ымпыгын-чымпыгым биллэҕим диэн билигин эрэллээхтик этэбин.

Оскуолабыт аҕыс кылаастаах буолан, оҕолор үөрэхтэрин орто оскуолаҕа баран салгыыллара, онно бүтэрэллэрэ. Мин икки кылааска салайааччынан үлэлээбитим, ол оҕолорбун бэйэм выпустарбынан ааҕабын. Ити кэмнэргэ кылааска отуччалыы оҕо үөрэнэрэ.Бу оҕолор билигин олохторун оҥостон, идэлээх үлэһит буолан, республика араас муннуктарыгар үлэлии-хамсыы сылдьаллар. Кинилэр ситиһиилэриттэн учуутал быһыытынан тэҥҥэ үөрсэбин, этэҥҥэ сылдьалларыттан эгди буолабын.

Мин үлэлиир кэммэр аҕыс кылаастаах оскуола директорынан Слепцов А.А., Черноградскай Г.В., Николаев И.И., Голиков Н.Н. үлэлээбиттэрэ. Кинилэр хас биирдиилэрэ оскуола иитэр-үөрэтэр үлэтигэр, материальнай-техническэй базата тупсарыгар кырата суох кылааттарын киллэрбиттэрэ.

Үөрэҕирии систиэмэтигэр урут да, билигин да элбэх уларыта тутуулар быыстала суох ыытыллар. Ол курдук дойду үрдүнэн саҥа таһымнаах үөрэх тэрилтэлэрэ аһыллыбыттара. Саҥа тэриллибит гимназия оҕото элбэх буолан, киэҥ-куоҥ оскуола наада буолбутугар, биһиги үлэлии олорор зданиебытын атастаһан, билиҥҥи оскуолабытыгар көспүппүт. Бу 1993 сыллаахха этэ. Билигин санаатахха улахан туох да малы-салы ылбакка, кабинеттарбытыттан аҕыйах туттар тэриллэрбитин эрэ илдьэ кэлбит эбиппит. Саҥа оскуолабыт кыараҕас соҕус да буоллар, икки сыллааҕыта тутуллубут дьиэ эбит этэ. Оскуоланы Хатылыков А.М. туттарбыта, биһиги иннибитинэ маҥнайгы нүөмэрдээх оскуола уонна гимназия биирдии сыл үөрэммиттэрэ.

1990-91 үөрэх дьылыгар аҕыс кылаастаах оскуола статуһа уларыйан, орто оскуола буолбута. Бу оскуолаҕа үлэлиир кэммитигэр салалта хаста да уларыйда. Үлэлээн ааспыт директордартан салайааччы да, киһи да быһыытынан үрдүк таһымнаах, үлэлэригэр бэриниилээх, олус эппиэтинэстээх дьонунан Н.Н.Голиковы, П.Н.Агаблевы ааттыахпын баҕарабын. Кинилэр хас биирдии үлэһит үөрүүтүн, кыһалҕатын чугастык ылыналлара, барыбытыгар көмөлөһөллөрө. Үөрэнээччилэри ахсыларын ааттарынан билэллэрэ, тэҥнээхтэрин курдук сыһыаннаһаллара, үөрэхтэригэр, кылаас таһынан да кэмҥэ куруутун өйүүллэрэ. Оҕолор билигин кинилэри үтүө тылынан ахталлар, махтаналлар. Кыракый оҕону киһилии сиэргэ-майгыга иитэн-үөрэтэн,олох киэҥ аартыгар бэйэлэрин суолларын булуналларыгар көмөлөһөрүнэн учуутал идэтэ кэрэхсэнэр.

Элбэх сыл устата үлэлии сылдьар оскуолам үйэ аҥардаах үбүлүөйүн өрө көтөҕүллэн туран көрсөбүн. Бииргэ үлэлиир үөлээннээхтэрбин , үөрэтэр оҕолорбун эҕэрдэлиибин.

Кэлэр да өттүгэр бу маннык

Кэскили түстүүргэ мунньустан,

Биир ньыгыл санааны булунан

Түмсүөҕүҥ кэлэр да кэмнэргэ!

 

Санаабытыгар санаа эбилиннин,

Күүспүтүгэр күүс киирдин,

Саҥалыы күүһүнэн ылсаммыт

Үлэлиэҕиҥ, үөрэниэҕиҥ!

 

Тапталлаах оскуолам!

Бар дьонуҥ, кэнчээри ыччатыҥ

Барҕа махталларынан кынаттанан,

Үйэҥ иккис аҥарыгар

Өссө да үтүмэн сылларга

Сырдык сулустуу сыдьаайан,

Үрдүктэн үрдүккэ дабайаар!

 

 

Н.С.Андреева,

РФ уопсай үөрэхтээһиҥҥэ Бочуоттаах үлэһитэ,

СР үөрэҕириигэ туйгуна.

 

 

Мин оскуолам - үөрэнээччи, учуутал, салайааччы буолбут кыһам

Үөрэммит, үлэлээбит оскуолам үйэ аҥаардаах үбүлүөйэ буола охсубут эбит.

Биһиги кылаас бастаан 1967-1968 үөрэх дьылыгар орто оскуолаҕа үөрэнэ киирбиппит. Бастакы учууталбытын Анна Николаевна Ильинаны олус махтана саныыбыт. Үһүс кылааска тахсыыбытыгар 8 кылаастаах оскуолаҕа эргэ икки этээстээх дьиэҕэ кылааһынан көһөрбүттэрэ. Учууталбытынан Мария Николаевна Охлопкова анаммыта. Мария Николаевна кыра кылаастарга барыбытын тэҥҥэ тутан төрдүс кылааһы бүтэртэрбитэ. 5-8 кылаастарга оскуолаҕа уһуннук үлэлээбит учууталлар үөрэтэн чиҥ билиини иҥэриммиппит. Бэһис кылааска кылаас салайааччыта Эверстова Мария Федотовна этэ. Онтон алтыс кылаастан Товарова Изабелла Алексеевна ылбыта. Изабелла Алексеевна немец тылын үөрэтэр этэ. Немецтии ырыа, хоһоон үөрэтэрэ, немец тылынан спектакль туруорбута. Нуучча тылын учууталынан Эверстова Мария Федотовна, онтон Лидия Семеновна Павлова үлэлээбиттэрэ. Математикага Чьямов Иннокентий Петрович үөрэппитэ. Кини олус ирдэбиллээх этэ. Наһаа точнай, хаһан да хойутаабат этэ. Хайаан да дьиэтээҕи үлэбитин бары толорорбутун ситиһэрэ. Саха тылыгар Макаров Святослав Тихонович үөрэппитэ. Элбэхтик өйтөн суруйарбыт. Бэйэтэ аахпыт кинигэтиттэн кэпсиирин сэргээн истэрбит. Физика учууталынан Эмма Ивановна Данилова этэ. Физкультура учууталынан Кононов Владимир Ильич үлэлээбитэ. Спорт күүскэ сайдыбыт кэмэ этэ. Хайыһарга күрэхтэһии үрдүк таһымҥа буолара. Олунньу ыйтан кыра залга хайыһарга дьарыктыыр этэ. 8-c кылааска үөрэнэр сылбытыгар үөрэхтэрин саҥа бүтэрэн химия, биология, география учууталлара кэлбиттэрэ, Валентина Самсоновна Белолюбская, Петр Архипович Белолюбскай уонна Марфа Матвеевна Аммосова.

Оскуола оҕолоро производственнай практикаҕа хайаан да барарбыт. Харбалаахха, Уус-Тааттаҕа хортуоска хостооһунугар сылдьыбыппыт. Саас тыаҕа мас мастыы, мутук умата барарбыт. Ленин төрөөбүт күнүгэр хайаан да субботникка тахсарбыт.

1970-1975 сылларга сэрииттэн эргиллибит сэрии ветераннара тыыннаахтар этэ. Кыайыы күнүгэр Луковцев Роман Кузьмиһы, Протопопов Семен Семеновиьы кытта көрсүһүүлэр буолаллара.

Биһиги оскуоланы бүтэрбит сылбытыгар 1975 сыллаахха оскуола саҥа корпуска киирбитэ. Онтон биһиги выпуск тохсус кылааска орто оскуолаҕа көспүппүт.

Оскуоланы, үрдүк үөрэҕи бүтэрэн, икки сыл Уус-Майаҕа үлэлээн баран 1984 сыллаахха үөрэммит оскуолабар үлэлии кэлбитим. Үөрэппит учууталларым үгүстэрэ үлэлээн бүтэн пенсияҕа олороллор этэ. Директорынан Наумов Василий Никифорович, директоры үөрэххэ солбуйааччынан Нина Михайловна Попова үлэлии сылдьаллара. Коллектив улахан этэ. Миигин кытта математика учууталынан Бойлохова Саргылана Николаевна эмиэ ол күһүн кэлбитэ. Алын кылаас учууталынан ол сыл Магаданнааҕы пединституты бүтэрэн кэлэн, Борисова Светлана Петровна үлэтин саҕалаабыта. Бииргэ үөрэммит кыргыттарбыт Галина Романовна Неустроева-Макеева уонна Анна Советовна Баишева онно үлэлии сылдьаллара. Оскуола улахан этэ, икки сменанан үлэлиирэ. Ол саҕана алын сүһүөх үс сыллаах этэ. Онон орто сүһүөх 4 кылаастан саҕаланар этэ. Миэхэ үс төрдүс кылааһы биэрбиттэрэ. 4а кылаас саха кылааһа дэнэрэ, онно кылаас салайааччытынан Анна Дмитриевна Луковцева, 4б кылааска кылаас салайааччытынан мин уонна 4в кылааска Наталья Дмитриевна Осипова буолбуппут. Үһүөннэригэр математиканы мини үөрэппитим. Үөрэхтэригэр үчүгэй оҕо наһаа элбэх этэ. Кэлин бары ситиһиилээх үлэһит үлэлии сылдьаллар. Кычкин Николай, Саввина Любовь, Саввина Оксана. Нина Михайловна эдэр учууталларга Школа молодого учителя диэн среда аайы ыытара. Эдэр учууталларга болҕомто, методическай көмө баар этэ. Онтон оҕоҕо көрөр уоппускаҕа олорон баран 1987 сыллаахха үлэлии тахсыбытым. Оскуола коллектива олус күүстээхтик үлэлиирэ. Үөрэнээччилэр оройуоҥҥа спортка, үөрэххэ бастакы кэккэҕэ сылдьаллара.

1992 сыллаахха Тааттаҕа гимназия аһыллан, оскуола сорох учууталлара, үөрэнээччилэрэ гимназияҕа көспүттэрэ. Биһиги үөрэнэ олорбут корпуспутун гимназияҕа биэрэн, 1994 сыллаахха билиҥҥи корпуспутугар көһөн кэлбиппит. Онно оскуола директорынан Неустроев Алексей Александрович, директоры үөрэххэ солбуйааччынан Кузьмина Наталья Михайловна, директоры иитэр үлэҕэ солбуйааччынан Агаблев Прохор Николаевич, Эртюкова Виктория Ивановна оҕо тэрилтэтин салайааччынан үлэлээбиттэрэ. Мин кылаас салайааччытынан илдьэ кэлбит оҕолорум ол сыл 6-с кылааска үөрэнэллэрэ. Кинилэр 2000 сыллаахха оскуоланы бүтэрбиттэрэ. Олус бэрээдэктээх, үөрэххэ кыһамньылаах үөрэнээччилэр этилэр. Кэлин улахан кылааска тахсыыларыгар биир кылаастан Могдоев Степа Чурапчы спортивнай оскуолатыгар, Белолюбскай Петя Тааттатааҕы гимназияҕа кэлин киирэн, онтон бэйэбит оскуолабытыгар Малышев Никита лидердэринэн, оҕолорго Президенинэн талыллан үлэлээбиттэрэ. Республикаҕа военно-патриотическай күрэххэ ситиһиилэнэн Орленок лааҕырга путевканан наҕараадалананнар, Малышев Никита, Васильев баран сынньанан кэлбиттэрэ. Тарасенко Юлия улууска волейбол командатыгар кыттан оонньуура, Надя Попова, Анна Мосоркина математикаҕа үчүгэйдик үөрэммиттэрэ, билигин улууска ааҕар-суоттуур эйгэҕэ үлэлииллэр. Ити курдук бары олоххо миэстэлэрин булан ситиһиилээхтик үлэлии сылдьалларыттан үөрэбин эрэ.

2000-2001 үөрэх сылыгар 5-с кылааска уолу-кыыһы арааран үөрэтиини олоххо киллэриини саҕалаабыппыт. Бу бырайыак эбии ырытыллан, салгыы 8-с кылааска холбоспуттара. Кыра кылаастарга кыыс уолу баһыйан, уол актыыбынаһа түһүүтэ баара. Бу бырайыагынан уолаттар бэһис кылаастан 11-с кылааска диэри актыыбынастара үрдээн испитэ. Бары оскуоланы ситиһиилээхтик бүтэрэн билигин үрдүк үөрэхтээх техническай идэлэри ылан таһаарыылаахтык үлэлии сылдьаллар. Ол курдук, Унаров Андрей хайа инженеринэн АЛРОСА-ҕа, Алексеев Илларион сүрүн инженеринэн «Саханефтегаз» ААО-ҕа, Максимов Дмитрий Стройгазсервискэ инженеринэн үлэлииллэр.

2002 сылтан директорынан Голиков Николай Николаевич анаммыта. Мин директоры үөрэххэ солбуйааччынан үлэлээбитим. Бу сылларга Россияҕа, Саха сиригэр үөрэхтээһиҥҥэ улахан уларыйыылар буолбуттара. Ол курдук, биир кэлим экзамен, профильнай үөрэхтээһин, хамнаһы оҕо ахсаанынан ааҕыы киириилэрэ элбэх билиини-үөрэҕи эрэйбитэ. Бэйэҥ үөрэнэн педколлективка тиэрдии, өйдөтүү үлэтин ыытарбыт. Бу сылларга үөрэхтээһиҥҥэ саҥа сүүрээннэр киириилэрэ олус күүскэ барбыта. Федеральнай государственнай стандартка киирии сүһүөхтэринэн сыыйа киирэн барбыта. Образовательнай программалары олоххо киирэллэрин ситиһии улахан ирдэбилгэ турбута. Оҕо үөрэнэр чааһын таһынан, уруок кэнниттэн дьарыктанарыгар чаас көрүллэр буолбута. Онно усулуобуйа тэриллиитэ, учуутал таһымын үрдэтиитэ хонтуруолга күүскэ ылыллыбыта. 2000 сыллартан учууталлар аттестацияны барыылара 5-тии сылынан уларыйан испитэ. Сыл аайы учууталлар таһымнара үрдээн, 2015 сылга 42% үрдүк категориялаах, 35% бастакы категориялаах буолбуттара. Саха сирин үөрэҕириитин туйгуннара-14, Россия уопсай үөрэхтээһинин Бочуоттаах үлэһиттэрэ-4. Гимназия аһыллыбытын кэнниттэн аллараа сүһүөҕү хаачыстыбалаахтык бүтэрбит үгүс оҕолорбут гимназияҕа, лицейгэ киирэллэрэ. Ол эрээри биһиэхэ хаалан үчүгэйдик үөрэнэн оскуоланы бүтэрбит оҕолорбут элбэхтэр. Оскуоланы мэтээлинэн 2006 сыллаахха Большакова Виктория, 2007 сыллаахха Максимов Дмитрий бүтэрбиттэрэ. Элбэх выпускниктарбыт орто, үрдүк анал үөрэҕи бүтэрэн билигин араас салааларга ситиһиилээхтик үлэлии сылдьалларынан киэн туттабыт. Ол курдук, 2007 сыллаахха уолаттар туспа үөрэниилэригэр 2014 сыллаахха ИРОиПК ны кытта кылаас таһынааҕы дьарыкка авторскай курс оскуола базатыгар ыытыллыбыта. Театральнай студия холобуругар ол курска улуус, регион учууталлара үөрэммиттэрэ. Курсу Охотина К.М. салайан ыыппыта, театральнай студия салайааччыларынан оскуола учууталлара Эртюкова В.И., Татаринова Е.И., Сивцева С.В. этилэр. Оскуола учууталлара ол курстан бырайыак суруйарга, оҕо индивидуальнай маршрутун суруйарга үөрэммиттэрэ. Бэйэлэрин уопуттарын үллэстибиттэрэ.

Ити курдук үөрэммит, үлэлээбит, салайсыбыт оскуолам үбүлүөйдээх сылыгар ахтыым маннык. Киһи олоҕор бэйэтин кыаҕынан, өйүнэн-санаатынан олорон кэлэр. Мин бэйэм оскуолабар киллэрсибит кылаатым баарын бэлиэтээн, ахтыы быһыытынан ааспыт үтүө кэмнэрбин астына суруйдум.

Э.Х. Кашкина,

СР үөрэҕириитин туйгуна,

СР үтүөлээх учуутала, Учууталлар учууталлара,

РФ Президенин Гранын хаһаайына

 

Мин 1985 сыллаахха СГУ историко-филологическай факультетын нуучча тылын салаатын бүтэрэн, төрөөбүт Тааттабар ананан, Ытык Күөл аҕыс кылаастаах оскуолатыгар үлэбин саҕалаабытым. Педколлективка саҥа үөрэхтэрин бүтэрбит эдэр специалистар элбэх этибит: Луковцева М.Н., Неустроев А.А., Кузьмина Н.М., Сивцева И.А., Филатова Н.П., Голиков Н.Н., Агаблев П.Н., Федотова А.И., Федорова А.А., Бойлохова С.Н. уо д.а. Билигин санаатахха, элбэх да үлэ миэстэтэ тахсыбыт эбит!
Бастаан оскуолаҕа сөҕө көрбүтүм элбэх омук оҕото баарын. Бу интернациональнай састаапка урукку Советскай Союз араас муннугуттан бааллар этэ.
Мин бу оскуолаҕа бастаан декретнэй уоппускаҕа олорор үлэһити солбуйа киирбит буолан быстах биир сыл үлэлээбитим.
Аҕыйах сыл буолан баран директор Николаев И.И. бастайааннай үлэҕэ ыҥыран ылбыта. Биһиэхэ барыбытыгар тута наставник анаабыттара. Завучпут Попова Н.М. сүрдээх ирдэбиллээҕэ. Наһаа бэриниилээхтик үлэлиирэ. Кини эдэр учууталларга улахан болҕомтотун уурара. Миигин «Техника и культура ведения урока” диэн эдэр учууталларга аналлаах курска Дьокуускайга ыыппыттара. Онно элбэҕи билэн-көрөн, практическай көмө бөҕө ылан үлэлиирдии кынаттанан кэлбиппин умнубаппын. Оскуола методическай темата «Активные формы обучения» диэн этэ. Ол чэрчитинэн араас тииптээх уруоктар ыытыллаллара. Икки сменанан үлэ тигинэччи барар этэ.
Билигин үөрэхтээһиҥҥэ инновация диэн тыл биир тутаах өйдөбүл буолан турар. Мин санаабар, өссө ааспыт үйэ 90-c сылларыгар директорбыт Иосиф Игнатьевич инновацияҕа үлэлэспитэ. Педсовекка хайаан да кэпсэтии тахсар гына
«Учительская газета» бэчээттээбит ыстатыйаларын ырытара, саҥа сүүрээни көрдүүрэ. Салайааччы буолан туран бэйэтигэр наһаа ирдэбиллээхтик сыһыаннаһара. Барытын бэриэт аахпыт- билбит буолара. Онон чахчы учууталлары сирдиир, инники күөҥҥэ сылдьар этэ. Профильнай кылаастары аһыы, оҕону алтатыттан үөрэтии, алын кылаастан омук тылын киллэрии- бу барыта кини салайарын саҕана олоххо киирбитэ. Аҥардас хаһаайыстыба өттүн өрө туппакка, үөрэххэ ураты болҕомто уурар, инникини өтө көрөн дьаһанар директор быһыытынан сыаналыыбын. Иосиф Игнатьевич дэҥҥэ көстөр директор этэ.
Иосиф Игнатьевич уонна саҥа завуч Светлана Петровна Дедюкина оскуола иһинэн
«Бастын эдэр учуутал» конкурс ыыппыттара. Олох бары наһаа көхтөөхтүк кыттыбыппыт. Уруогу таһынан «Педагогическая находка» диэн түһүмэх баара. Мин түүнү быһа толкуйдаан оҕолор аахпыт айымньыларыгар олоҕурар «Литературное лото» оҥорбутум. Кыайыылаах физкультура учуутала Агаблев П.Н.буолбута. Уруогун олус хайҕаабыттара, бириэмэтин сөпкө туһанар диэн бэлиэтээбиттэрэ. Конкурска кыттан бары номинациянан бэлиэтэммиппит, мин «Кэскиллээх учуутал» диэн номинация ылбытым. Иосиф Игнатьевич бары кыттааччыларга электроннай хары чаһыыта бэлэхтээн үөрдүбүтэ.
Завуч Светлана Петровна дьону
үлэҕэ бэркэ көҕүлээбитэ. Киһиэхэ барытыгар наһаа үчүгэй сыһыаннааҕа. Өссө уһуннук үлэлии түспүтэ буоллар. Куоракка көһөннөр СГУ-га үлэлиир эбит этэ.
Аны коллективынан олус
үчүгэйдик Саҥа дьылы бэлиэтиир этибит. Профсоюзтар сүүрэн-көтөн лотерея оонньотоллор этэ. Сүүйүүтэ дэлэйэ, сыалыһар балык кытта баар буолара. Бары илии тутуурдаах баран үөрүү-көтүү бөҕө буолбуппут.
Аҕа саастаах коллегаларбыттан Диана Афанасьевна Аргунова туһунан ахтыахпын баҕарабын. Кинини олус истиҥник саныыбын. Туохха да мунчаарбытын биллэрбэт киэҥ көҕүстээх буолара. Куруутун өрө аспыт курдук майгылаах этэ. Кини сырдык мичээрэ үтүө өйдөбүл буолан хаалбыт. Диана Афанасьевна салайар естественнэй холбоһугар Мира Николаевна, Светлана Петровна буолан олус иллээхтик үлэлээбиттэрэ. Ветеран учуутал Элякова А.С. ыалдьыттыы кэлэ сылдьан, үөрэ-көтө кэпсээн турар: Арай кылааска киирбитим, естественник учууталлар билигин манна биир учууталбыт аһаҕас уруога буолар диэн кылаас муостатын сууйа сылдьаллар эбит.
Нуучча тылын учууталларын холбоһугар наставниктарым Колтовская С.Н., Макарова Л.С., Осипова Н.Д. кытта бэркэ үлэлээбиппит. Элбэх тэрээһиннэр буолаллара. Аттестация барыытыгар бэйэ бэйэбитигэр көмөлөсүһэр этибит. Кинилэр саҥа үлэлээн эрэр учуутал уруогар айымньылаахтык сыһыаннаһыахтааҕын, бастатан туран бэйэтигэр ирдэбиллээх буолуохтааҕын бэйэлэрин үлэлэринэн миэхэ холобур буолбуттара.
Ити курдук үтүө да дьоннору кытта үлэлээн, алтыһан ааспыт эбиппин! Үлэлээбит оскуолам кэлин Д.А.Петров аатын сүгэн, алгыстаах айана саҕаланан, саха норуотун чулуу уолун аатын үйэтитэр сыаллаах элбэх үлэни ыытта. Ол түмүгэр күн бүгүн бэйэтэ үтүө үгэстэрдээх, айымньылаах үлэлээх оскуола буолла. Үлэлээбит оскуолам коллективым юбилейынан эҕэрдэлиибин! Саха тыллаах сайда турарын туһугар айыҥ, тутуҥ, үйэлээҕи үксэтиҥ!

 

 

 

Форма входа
Календарь
«  Ноябрь 2017  »
ПнВтСрЧтПтСбВс
  12345
6789101112
13141516171819
20212223242526
27282930
Случайное фото
Случайное фото
Баннеры
Министерство образования и науки Российской Федерации

Управление образования Таттинского улуса

Федеральный портал "Российское образование"

Единое окно доступа к образовательным ресурсам

Единая коллекция цифровых образовательных ресурсов
Федеральный центр информационно-образовательных ресурсов
йойойой йойойойййй

Copyright МБОУ Ы-КСОШ №2 © 2017
Хостинг от uCoz