Суббота, 18.11.2017, 02:35
Приветствую Вас Гость | RSS

Ытык-Кюельская СОШ №2 им Д.А. Петрова

Меню
Альбомы
Статистика

Онлайн всего: 1
Гостей: 1
Пользователей: 0

Каталог статей

Главная » Статьи » Мои статьи

История школы

Оскуола историятын кэрчиктэрэ.

 

 

1960-с сыллар ортолоругар дылы Ытык Күөлгэ биир орто оскуола баара. Сыллата бөһүөлэк кэҥээн, оҕо ахсаана элбээн, 1966-67 үөрэх сылыгар, орто оскуолаттан арахсан, туспа аҕыс кылаастаах оскуола баар буолбута. Бу икки этээстээх эргэ корпуска аһыллыбыт оскуолаттан Ытык- Күөл 2-с нүөмэрдээх оскуолатын историята саҕаламмыта.

1966-67 үөрэх сылыгар бастакы директорынан Аҕа дойду Улуу сэриитин активнай кыттыылааҕа, “Аҕа дойду сэриитэ” орден 2-с степенин икки төгүллээх кавалера, “Хорсунун иһин” мэтээл кавалера, кэлин САССР культуратын үтүөлээх үлэһитэ, Россия персональнай пенсионера буолбут, Алексеев Николай Иванович анаммыта. Директоры үөрэх чааһыгар солбуйааччынан Ермолаев Егор Гаврильевич буолбута. “Если вот так вспомнить в целом те времена, то они были исключительно хорошими, дали нам самоутвердиться. Коллектив школы был хорошим, работящим, молодым, свободным от старых традиций. Учителя вносили новое в учебно-воспитательный процесс. Посещали уроки друг друга. Мне запомнились очень интересные уроки по арифметике, алгебре, геометрии Чьямова И.И., Большаковой А.А., уроки географии Яковлевой Е.М., учителей начальных классов Марии Платоновны, Веры Сергеевны и других. Помню, как на тренировках мы боролись с Чьямовым И.П., Макаровым Н.К. и другими за право выступить в составе команды учителей против команды борцов учащихся” диэн бастакы директорбыт Николай Иванович ахтыбыт. Барыта 16 кылаас-комплект баарыгар 373 үөрэнээччи үөрэммитэ, 29 учуутал үлэлээбитэ. Уруок тас іттµгэр о±ону сайыннарыыга уон биэс араас куруґуоктар, секциялар, элбэх тэрээґиннэр ыытыллалларын директор оччотоо±у отчуота туоґулуур. Аҕыс кылаастаах оскуола бастакы выпускниктарынан 41 оҕо буолбута. Кинилэр ортолоруттан А.Д.Петрова СР Правительствотын Бэчээккэ уонна маассабай информация средстволарыгар Департамент управлениетын начальнигар, А.А.Морхоева Бэчээт туйгунугар, РФ журналистарын союһун чилиэнигэр, Таатта улууһун бочуоттаах гражданиныгар, А.Е.Илларионова Амма улууһун Ис дьыалатын отделын начальнигын солбуйааччытыгар, Таатта дьахталларыттан бастакы подполковникка, М.А.Мурунов РФ журналистарын союһун чилиэнигэр, Т.Н.Николаева Сунтаар улууһун Бүлүүчээн техническэй лицейин завуһугар, С.И.Михайлова СР культуратын туйгунугар, М.С.Белолюбская РФ сибээһин туйгунугар тиийэ үүммүттэрэ.

1975-76 үөрэх сылыгар оччотооҕу директор Кузьмин Михаил Гаврильевич көҕүлээһининэн 320 миэстэлээх оскуола саҥа дьиэтэ тутуллан үлэҕэ киирбитэ. Ол туһунан РФ үөрэҕириитин туйгуна, СР Учууталларын учууталлара,СР үөрэҕириитин Бочуоттаах үлэһитэ, Таатта улууһун Бочуоттаах гражданина, тыыл ветерана Михаил Гаврильевич бу курдук ахтар: “Эргэ икки этээстээх оскуола акылаата сытыйан дьиэ корпуһа бүтүннүү хамсаабыта биллибитэ, онон үгүс туруорсуу кэнниттэн 1975 сыллаахха саҥа оскуола дьиэтэ үлэҕэ киирбитэ. Миэхэ уһуннук завхоһунан үлэлээбит В.Х.Аржаков өйөбүл буолбута. Аҕыс кылаастаах оскуола уратыларынан буолара:

- сыллата үөрэнэр оҕо ахсаана эбиллэн 400-кэҕэ тиийбитэ;

- 1-8 кылаастарга биирдии нуучча кылаастара үөрэнэллэрэ, ону таһынан саха кылаастара бааллара.Баларга биллиилээх, ытыктанар учууталлар Данилова В.В., Иванова М.П., Охлопкова М.Н., Севастьянова М.Г., Слепцова З.Н., Слепцова М.Г., Винокурова К.С. уо.д.а. олус үчүгэйдик үлэлээбиттэрэ.

-физкультураны уонна спорду үрдүк таһымнаахтык Кононов В.И. үөрэтэрэ-тэрийэрэ. Кини оҕолоро разрядтаах буолаллара, оройуоҥҥа спартакиадаларга тиийэ кытталлара, орто оскуолаҕа мэлдьи үчүгэй спортсменнары бэлэмнээн биэрэрэ.

-1969 сылтан физмат кылаас аһыллыбыта, учууталынан Голиков И.А. үлэлээбитэ, бу хамсааһыны үчүгэй үөрэнээччилэринэн учууталлар Большакова А.А., Чьямов И.П., Слепцова А.П. хааччыйбыттара. Оскуолабыт сыыйа үөрэнээччи кылааһыгар хаалыытын суох оҥорбут, чиҥ билиини биэрэр, төрөппүттэр уонна общественность билиниитин, ытыктабылын ылары ситиспит биир бастыҥ педагогическай коллектив буолбута.

-бу оскуолаҕа араас сылларга завучтарынан уонна учууталларынан үлэлээбит үөрэх-иитии процеһын, ону тэрийиини үчүгэйдик баһылаабыт, дириҥ билиилээх педагогтар биллиилээх директордарга тиийэ үүммүттэрэ, ол курдук нуучча тылын учуутала Слепцов Г.В. үйэ чиэппэриттэн ордук кэмҥэ Верхоянскай улууһугар, РФ үөрэҕин туйгуна Борисов А.З. Харбалаах орто оскуолатыгар, СР үөрэҕириитин үтүөлээх үлэһитэ Малышев Л.Н. Чычымах орто оскуолатыгар, географ Луковцев Ф.С. Уолба орто оскуолатыгар уо.д.а. Онон, бу оскуола салайар кадрдары биэрбит үтүөлээх”.

1974-81 сылларга оскуолабыт биир биллэр-көстөр салайааччытынан- директорынан, завуһунан үлэлээбит САССР үтүөлээх учуутала, Таатта улууһун Бочуоттаах гражданина Христина Ананьевна Слепцова этэ.“25 сыл устата үлэлээн кэлбит кэммэр улахан да, кыра даҕаны коллективтар үлэлэрин салайсарбар бэйэбэр улахан көрдөбүллэри туруорабын: дьон үлэтин сыаналааһыҥҥа барыта толору кырдьыктаах буоларыгар үлэлээбит үлэ түмүгэ көстөр, суоллаах-иистээх буоларыгар; коллектив хас биирдии чилиэнигэр болҕомтолоохтук сыһыаннаһарга;коллектив доруобай, бэйэ-бэйэни өйдөһөр, коммунистическай өйүнэн-санаанан салайтарар буоларыгар” диэн кини ахтыытыгар суруйар. Сүрүн үлэтин таһынан үгүс общественнай үлэлэрдээх ирдэбиллээх салайааччы коллектива нэһилиэнньэ олоҕор көхтөөхтүк кыттара, араас субуотунньуктарга, фестивалларга, спортивнай тэрээһиннэргэ өрүү инники күөҥҥэ сылдьара. Оскуолаҕа уһуннук үлэлээбит, завучтаабыт “Бочуот знага” орден кавалера Святослав Тихонович Макаров 1980 сыллаахха бу курдук бэлиэтээбит:Оскуолаҕа кабинетнай система олохтонон эрэр. Республика үрдүнэн бастаабыт математика кабинетын Попова Н. М. тэрийдэ, онордо. Кабинекка техническай средстволар, элбэх көрдөрөн үөрэтэр пособиелар түмүллүбүттэр. Маны таһынан химия, история, физика, саха-нуучча тылларын кабинеттара балачча тэриллэн эрэллэр. Быйыл 6 саастаахтарга икки экспериментальнай кылаас аһылынна. Барыта 18 кылаас комплект буолла. Үөрэх-иитии үлэтигэр санаттан-сана ньымалары киллэрэн иһии түмүгэр үөрэҕи билии, хаачыстыба улаатар. 100 бырыһыан билиилээх кылаастар ахсааннара сыллата элбии турар. Өскөтүн 1969-70 үөрэх дьылыгар кинилэр ахсааннара 3 эрэ эбит буоллаҕына 1978-79 үөрэх дьылыгар кинилэр ахсааннара 14 кылаас буолар. Оттон 1969-70 үөрэх дьылыгар оскуола качественнига 60, отличнига 6 эбит буоллаҕына, ааспыт үөрэх дьылыгар качественник 126, отличник 12 буолла”.

1986 сыллаахха оскуола хамаандата “Айылҕа-биһиги дьиэбит” диэн республикатааҕы күрэххэ кыттан үһүс миэстэ буолбута. Д.А.Аргунова салайбыт оскуола пришкольнай-опытнай учаастага улууска биир бастыҥ этэ. Физруктар В.И.Кононов, А.А.Неустроев уһуйбут оҕолоро элбэх сылларга спортивнай спартакиадаларга иннилэрин биэрбэтэхтэрэ. Аҕыс кылаастаах оскуоланы үйэ чиэппэрин устата уон сэттэ оҕо туйгуннук үөрэнэн бүтэрбитэ.

1990 сыл кулун тутар 20 күнүнээҕи Алексеевскай оройуон исполкомун 2-12 №-дээх быһаарыытынан, оччотооҕу директор Николаев Иосиф Игнатьевич туруорсуутунан, оскуолабыт Ытык- Күөл 2 №-дээх орто оскуолата буолбута. Директоры солбуйааччыларынан үөрэх чааһыгар Аргунова Длияна Афанасьевна, Куприянова З.К. , иитэр үлэҕэ Неустроев Алексей Александрович үлэлээбиттэрэ. Энтузиаст директор Иосиф Игнатьевич салайбыт сылларыгар начаалынай оскуола туспа дьиэлэммитэ, саҥа мастерской үлэҕэ киирбитэ, автодело кабинета аһыллыбыта. Оскуолаҕа 29 кылаас-комплекка 502 оҕо үөрэммитэ. Бу сылларга педколлектив “Активные формы обучения и воспитания в целях реализации педогогики сотрудничества” диэн хайысханан үлэлээбитэ. 1992 сылтан үөрэтии дифференцированнай, профильнай көрүҥнэрэ эбии киллэриллибиттэрэ. 8-9 кылаастарга икки физмат кылаастар, 10 кылааска спортивнай-техническэй, естественнэй-гуманитарнай кылаастар, алын сүһүөххэ омук тылын, ритмиканы,

хоровой ырыаны, музыкальнай грамотаны дириҥэтэн үөрэтии экспериментальнай кылаастара аһыллыбыттара. Оскуолаҕа методическай үлэ көхтөөхтүк ыытыллыбыта: биология, химия, омук тылын, физика учууталларын улуустааҕы семинардара, предметнэй олимпиадалар, педагогическай ааҕыылар буолбуттара. Үлэ-сынньалаҥ лааҕыра тэриллэн үс сменанан үлэлээбитэ, үгүс оҕо оҕуруокка үлэлээн сайыҥҥы сынньалаҥын туһалаахтык атаарбыта.Үөрэнээччилэр комплекснай спартакиадаҕа бириистээх миэстэттэн түспэт этилэр. Оскуола төһүү үлэһиттэринэн ССРС үөрэҕириитин туйгуна Кононов В.И., РФ үөрэҕириитин туйгуна Попова Н.М., старшай-учууталлар Луковцева А.П., Аммосов М.М., методист-учууталлар Аргунова Д.А., Макарова Л.С., Луковцева А.Д., И.А.Товарова о.д.а.этилэр.

1993 сыллаахха оскуола урукку гимназия дьиэтигэр көһөрүллүбүтэ. Директорынан Неустроев Алексей Александрович, директоры солбуйааччыларынан үөрэх чааһыгар Охлопкова Зинаида Петровна, иитэр үлэҕэ Агаблев Прохор Николаевич үлэлээбиттэрэ. Коллективка 46 учуутал баара. 26 кылаас-комплект аһыллыбыта. “Сардаҥа” оҕо тэрилтэтэ, үрдүкү кылаас үөрэнээччилэрин Совета тэриллибиттэрэ. Оскуола биир улахан кыһалҕатынан дьиэ-уот кыараҕаһыттан икки сменанан үлэлээһин буолара. Ол иһин оскуола 1999-2000 үөрэх сылыттан, директор Прохор Николаевич Агаблев салайар кэмигэр, «Создание оптимальных условий УВП на основе социальных и этнопсихологических особенностей учащихся в режиме двухсменной сельской школы», 2003-2004 үөрэх сылыттан “Гендерный подход к формированию культурной компетентности учащихся” диэн хайысхаларынан улууска экспериментальнай площадка буолбута. Педколлектив эксперимент чэрчитинэн үөрэтии-иитии сонун ньымаларын киллэрбитэ: норуот үгэстэригэр олоҕуран уолу-кыыһы аналларынан иитии, орто сүһүөххэ арааран үөрэтии, күһүҥҥү-сааскы үөрэҕи Киэҥ Эбэ түөлбэтигэр былааннаан ыытыы, үөрэх структуратын табыгастаахтык наардаан 10-11 кылаастарга профильнай үөрэхтээһини киллэрии. Эксперимент сүнньүнэн “Семья и личность: гендер, общество, культура” диэн Таатта, Нам, Чурапчы улуустарын уонна СГУ, СГПА ученайдара кыттыылаах научнай-практическай конференция үрдүк тэрээһиннээхтик ыытыллыбыта. Манна уопсайа 214 учууталлар, оҕо садын иитээччилэрэ, төрөппүттэр кыттыыны ылбыттара.

2002 сыл олунньу 22 күнүнээҕи Таатта улууһун депутаттарын мунньаҕын быһаарыытынан, онтон 2006 сыллааҕы от ыйын 17 күнүнээҕи Саха Республикатын президенэ В.А.Штыров ыйааҕынан оскуолаҕа биир дойдулаахпыт, Албан Аат орден толору кавалера Дмитрий Ананьевич Петров аата иҥэриллибитэ. Бу кэмҥэ оскуола директорынан Голиков Николай Николаевич, директоры солбуйааччыларынан үөрэх чааһыгар Андреева Наталия Семеновна, иитэр үлэҕэ Копырина Жюлиана Григорьевна, инновацияҕа Луковцева Мира Николаевна үлэлээбиттэрэ. Оскуола 322 үөрэнээччилээх, 45 учууталлаах этэ. 2002-11 сылларга, Н.Н.Голиков салайбыт кэмнэригэр, оскуола сайдыы биир үрдүкү кэрдииһигэр тахсыбыта, атын оскуолалартан ураты суолун-ииһин булбута.

2004 сыллаахха оскуолаҕа арболитовай корпус эбии тутуллубута, эстетическэй кылаас аһыллан үөрэнээччилэри культурнай-эстетическэй иитиигэ үөрэтиини саҕалаабыта.

2008 сыллаахтан оскуола улууска соҕотох начальнай профессиональнай үөрэхтээһиҥҥэ лицензия ылары ситиһэн, үгүс үөрэнээччи ситии-хотуу аттестатын кытта анал үөрэҕи бүтэрбитин туһунан свидетельство ылар буолбута, улууска бастакынан автодромнаммыта.

Д.А. Петров аатын үйэтитии, үүнэр көлүөнэни патриотическай тыыҥҥа иитии үлэ биир сүрүн хайысхатынан буолбуттара уонна онно аналлаах тэрээһиннэр үтүө үгэскэ кубулуйбуттара. Ол курдук 2003 сылтан, үгүс оҕону түмэн, “Петровскай ааҕыылар”диэн регионнааҕы НПК ыытыллар. “Албан аат” музейа, үрдүкү кылаас оҕолоругар “Албан” байыаннай-спортивнай кулууп тэриллибиттэрэ. Кыраайы үөрэтэр “Батыс”, интеллектуальнай “Сайдыс” лааҕырдар аһылланнар оҕолор сайыҥҥы сынньалаҥнарын көдьүүстээхтик ыыталларыгар кыах биэрбиттэрэ.

Д.А.Петров дьиэ-кэргэнин бирииһигэр ытыыга күрэхтэһии уонна Кыайыы болуоссатыттан буойун төрөөбүт “Таастаах” алааһыгар дылы “Сулустаах эстафета” ыытыллар.

2012-2013 үөрэх сылыттан 5-6 кылаастарга кадетскай кылаастар аһыллыбыттара. 2008, 2010 сылларга оскуола “Герой аата ааттаннын!” диэн уолаттарга аналлаах регионнааҕы патриотическай ырыаҕа бырайыага СР культураҕа уонна духовнай сайдыыга министерствотын Гранын ылары ситиспитэ.

2010 сылтан алын сүһүөх кылаастар методическай холбоһуктара улуус үөрэнээччилэригэр байыаннай ырыа уонна хаамыы көрүүтүн тэрийэн ыыталлар.

Билиҥҥи кэмҥэ директорынан Сергеев Дмитрий Вячеславович, директоры солбуйааччыларынан үөрэх чааһыгар Лопатин Георгий Васильевич, Борисова Светлана Петровна, иитэр үлэҕэ Тарасова Ульяна Ивановна, орто анал үөрэх уонна орто оскуоланы алтыһыннаран идэлэри биэриигэ Иван Николаевич Попов үлэлииллэр. Оскуола коллектива «Внедрение эффективных педагогических технологий как фактор повышения качества образования и воспитания обучающихся» диэн теманан салайтарар уонна үөрэнээччилэр интеллектуальнай, спортивнай итиэннэ айар талааннара сайдарыгар үгүс өрүттээх үлэни ыытар. Биһиги үөрэнээччилэрбит регионнааҕы, республикатааҕы научнай-практическай конференцияларга тиһигин быспакка ситиһиилээхтик кытталлар.

2014 сыллаахха оскуолаҕа «Внеурочная деятельность как условие развития компетентностей учащихся в условиях реализации ФГОС» республиканскай курс үрдүк тэрээһиннээхтик ыытыллыбыта.

Оскуола, билиҥҥи кэм ирдэбилигэр сөп түбэһиннэрэн, уопсай орто оскуола программатын кытта начаалынай профессиональнай үөрэхтээһини алтыһыннаран үөрэтиигэ саҥа хайысхалары көрдүүр уонна олоххо киллэрэр.

 

Оскуоланы өр сылларга салайбыт дириэктэрдэр

Сырдыгы тарҕатар кыһабыт барахсан

Улуус киинэ Чөркөөхтөн Ытык-Күөлгэ, Таатта улууһа диэн Боотурускайтан арахсан туспа улуус быһыытынан 1913 с. тохсунньу 1 күнүгэр тэриллибитинэн, Ытык-Күөлгэ көһөн кэлбитэ, улууспут 12 нэһилиэктээҕэ. Советтар бүтүн Саха сиринээҕи VI съезтэрин уурааҕынан 1930 с. кулун тутар 25 күнүгэр саҥалыы 17 нэһилиэктээх Таатта оройуона диэн буолбута, оройуон 25 нэһилиэктэммитэ. Улуус-оройуон киинигэр бүгүҥҥү курдук улахан тутуу барбат этэ, администрация уонна оскуолалар дьиэлэрин тутууну саҥа былааннаан са5алаабыттара. Холобур, Чөркөөххө 7 кылаастаах оскуола үлэлиирэ, Игидэйгэ 1933-34 сс. 5 - 7 кылаастар ыһыллыбыт буоллахтарына, Ытык-Күөлгэ 1936-37 сс. 5 – 7 кылаастар аһыллыбыттара. Салгыы 8-10 кылаастар (орто оскуола) 1939-1942 сс. эрэ саҥа аһыллан үлэлээн барбыттара. Онтон 1966 сыллаахха аҕыс кылаастаах оскуола туспа аһыллыбыта. Ол туһунан, дириэктэр быһыытынан, үлэлээн ааспыт кэммиттэн кылгас ахтыыны оҥорорго сананным.

Бу саҥа тэриллибит 8 кылаастаах оскуола 2-3-түү параллельнай кылаастаах, 500-чэкэҕэ чугаһыыр үөрэнээччилээх, 30-н тахса учууталлаах, араас омуктартан састааптаах дьиҥнээх интернациональнай оскуолаҕа кубулуйбута. Советскай былаас, Компартия үрдүк ирдэбиллэригэр эппиэттээн оскуола үөрэтэр - методическай, иитэр – комсомольскай, пионерскай үлэҕэ, оскуола-производство-ВУЗ диэн дойду үрдүнэн биллибит хамсааһыннарга кыттара, онтон да атын үгүс опыт, түмүк, ситиһии, үрдүк патриотизм уонна энтузиазм чаҕылхай көстүүлэрэ, инникигэ ыҥырар суолдьут сулус буолан, тырымнаһа оонньууллара.

Оскуолаҕа араас кэмҥэ дириэктэринэн Аҕа дойду сэриитин кыттыылааҕа, математик Алексеев Николай Иванович, СР үтүөлээх учуутала, нуучча тыла идэлээх Аргунов Федот Корнилович, саха тылын учуутала Кузьмин Михаил Гаврильевич үлэлээбиттэрэ, элбэх үлэни ыыппыттара.

Баара- суоҕа 31 сыл устата орто оскуола буолан үлэлээбит икки этээстээх үтүөкэн да мастаах дьиэ акылаатын төгүрүччү оһох кирпииччэлэринэн сабараанньалаан кэбиһэннэр, хаҥас өттө ардах-хаар уутуттан, сытыйан эмэх буолан 25-30 см ибили баттанан, уҥа-хаҥас истиэнэлэр, өһүөлэр, үөһээ этээс муосталара хамсааннар, сөргүтүллубэт гына быһыыта-таһаата уларыйан, алдьанан правительственнай комиссия оскуоланы саптарбыта, саҥа 320 миэстэлээх оскуола тутуутугар дьаһал биэрбитэ.

Ол мин туттарбыт оскуолам кэлин гимназия, онтон лицей быһыытынан күн бүгүнүгэр диэри 40 сыл устата үлэлээн кэллэ.

Салгыы дириэктэринэн СР үтүөлээх учуутала Слепцова Х.А., улахан энтузиаст, новатор Николаев Иосиф Игнатьевич элбэх саҥалыы идеяны киллэрэн үлэлээбиттэрэ.

 

Оскуолам уонна учууталларым барахсаттар.

Аҕыс кылаастаах оскуола оччолорго оҕотун уонна учууталларын ахсаанынан улууска иккис миэстэҕэ сылдьара.

Оскуола уратыта:

  1. Сыллата үөрэнэр оҕо ахсаана эбиллэр этэ, 300-403 оҕоҕо тиийэрэ

  2. 1-8 кылаастарга биирдии нуучча кылаастара аһыллыбыттара. Бу кылаастарга биллиилээх, ытыктанар учууталлар Данилова В.В., Иванова М.П., Охлопкова М.Н., Севастьянова М.Г., Слепцова З.Н., Слепцова М.Г., Винокурова К.С. уонна да атыттар олус үчүгэйдик үлэлээбиттэрэ, бары педагогическай үлэ уонна тыыл ветераннара буолбуттара, элбэх наҕараадалаахтар.

  3. ССРС, РФ үөрэҕириитин туйгуна, улуус Бочуоттаах гражданина Кононов В.И. физкультура уруогун үрдүк таһымнаахтык үөрэтэрэ-тэрийэрэ. Кини оҕолоро разрядтаах буолаллара, оройуоҥҥа улахан кылаастар спартакиадаларыгар тиийэ кытталлара. Ытык-Күөл 1 №-дээх орто оскуолатыгар бастыҥ спортсменнары сыллата биэрэрэ.

  4. Орто оскуолаҕа физмат кылаас 1969 с. тэриллибитэ. Учууталынан Голиков Иннокентий Алексеевич, ф.м.н. доктора, үлэлээбитэ. Физмат хамсааьыны үчүгэй, киэн билиилээх үөрэнээччилэринэн Большакова А.А., Чьямов И.П., Слепцова А.П. хааччыйбыттара.

  5. Үөрэнээччи кылааһыгар иккис сылын хаалыытын суох оҥорбут, оҕолорго чиҥ билиини биэрбит, төрөппуттэр уонна дьон-сэргэ билиниитин, ытыктабылын ылары ситиспит биир бастыҥ педагогическай коллектив буолбута. Олортон чорботон СР үтүөлээх учууталын, завуһу Слепцова Х.А.; нуучча тылын уонна литературатын учууталларын РФ үөрэҕириитин туйгуна Шуткина Г.А., Павлова Л.С., Давыдова В.С., биолог РФ үөрэҕириитин туйгуна Макарова М.Р., химик Макаров Н.К.- II уонна Луковцева А.Д.; үлэ учууталларын Аҕа дойду сэриитин кыттыылааҕын Охлопков М.К., Баишев М.И.; саха тылын уонна литературатын, «Бочуот знага” орден кавалера, тустуук Макаров С.Т. бэлиэтиибин.

  6. Бу оскуола5а араас сылларга завуһунан уонна учууталынан үлэлээбит үөрэх-иитии хаамыытын, ону тэрийиини баһылаабыт, дириҥ билиилээх нуучча тылын учуутала Слепцов Г.В. үйэ чиэппэриттэн ордук кэмҥэ Верхоянскай улууһугар; РФ үөрэҕин туйгуна Борисов А.З. – Харбалаах орто оскуолатыгар; СР үөрэҕириитин үтүөлээх үлэһитэ Малышев Л.Н. – Чычымах орто оскуолатыгар; көрсүө-сэмэй, географ Луковцев Ф.С..- Уолба орто оскуолатыгар дириэктэринэн улэлээбиттэрэ, онтон да атыттар бу оскуолаттан үүнэн-сайдан тахсыбыттара. Онон бу оскуола элбэх салайар кадры биэрбит үтүөлээх.

    Оччотооҕу педколлектив иллээх, сыралаах, ситиһиилээх үлэтэ саҥа үйэҕэ Д.А.Петров аатынан Ытык-Күөллээҕи 2-с №-дээх орто оскуола буолан салҕанар.

     

Бастыҥ учууталлар.

Биьиги оскуолабыт улууска опыттаах, идэлэригэр бэриниилээх кадрдар сөҥөн хаалбыт кыһалара этэ. Алын кылаастарга номоххо киирбит дьон-сэргэ биһирэбилин ылбыт, интернационалист-методист, Ленинград блокадатын кыттыылааҕа, РФ үтүөлээх учуутала алын кылаастары үөрэппит финн омуктан төрүттээх Данилова (Юпилайнен) Вера Васильевна; РФ үөрэҕириитин туйгуннара Иванова М.П., Севастьянова М.Г., Луковцева А.П., Герой-ийэ Охлопкова М.Г., Максимова, уо.д.а.үлэлээбиттэрэ.

Онтон V-VIII кылаастарга нуучча тылын бурятка Шуткина Г.А. уонна Павлова Л.С., саха тылын “Бочуот знага” орденнаах Макаров С.Т., немец тылын “Учууталлар учууталлара” Товарова И.А.; математиканы ситэ олох олорботох, номоххо киирбит улахан шахматист Чьямов И.П; “Учууталлар учууталлара” Большакова А.А., Слепцова А.П., “РФ үөрэҕириитин туйгуна” Попова Н.М., физкультураны ССРС уонна РФ үөрэхтээһинин туйгуна Кононов В.И. биэрбиттэрэ.

 

Үөрэнээччилэр тустарынан.

  • суруйар биллэн туран кыаллыбат, аҕыйах выпускнигы ааттыахха сөп. Борисов Егор Егорович - медицинскай наука доктора, ытыктанар специалист; Большаков Александр Михайлович - техническай наука доктора, ФНА Бочуоттаах профессора (Россия наукаларын Бочуоттаах профессора буолуу диэн бу сахаларга, буолаары буолан Таатталарга, сонун көстүү). Россия хайа эрэ промышленнаһыгар куттал суох буолуутун науканан дакаастаабыт уонна ону олоххо киллэрсибит ытыктанар ученай буолар. Кини Саха сирин тыйыс тымныытыгар неби-гааһы уһуннук хаһаанар, тулуйумтуо турбалар уонна резервуардар саҥа көрүҥнэрин айсыбыт киһи. Талааннаах математик, МГУ-га ахсаан салаатын бүтэрбит Кузьмин Иван Федорович, Москваҕа Бауман Н. Э. аатынан техническай университекка промышленник уонна экономист-менеджер идэтин ылбыт Ильина Анна Ильинична.

Билигин талааннаах, оскуоланы үчүгэйдик бүтэрбит ханнык баҕарар оҕо, омук сиригэр тиийэ, сөбүлүүр үөрэҕэр үөрэнэн сэдэх, үрдүк квалификациялаах идэни ылыан сөп.

 

М. Г. Кузьмин,

РФ норуотун үөрэҕириитин туйгуна,

Учууталлар учууталлара,

Таатта улууһун Бочуоттаах гражданина,

үлэ, тыыл ветерана

 

 

 

Категория: Мои статьи | Добавил: sch2ytyk (27.10.2016)
Просмотров: 256 | Рейтинг: 0.0/0
Всего комментариев: 0
Форма входа
Случайное фото
Случайное фото
Баннеры
Министерство образования и науки Российской Федерации

Управление образования Таттинского улуса

Федеральный портал "Российское образование"

Единое окно доступа к образовательным ресурсам

Единая коллекция цифровых образовательных ресурсов
Федеральный центр информационно-образовательных ресурсов
йойойой йойойойййй

Copyright МБОУ Ы-КСОШ №2 © 2017
Хостинг от uCoz